प्रतीक्षा

शांत आहे आज सागर

सुन्न आहे सांजवारा

लाट चंचल स्तब्ध आहे

मौन पांघरुनी किनारा

ये सखे परतून लवकर, अंत बघते ही प्रतीक्षा

बघ कसे अस्वस्थ सारे फक्त नसण्याने तुझ्या ॥ धृ ॥

रोजची ती पाखरांची धुंद किलबिल बंद आहे

पौर्णिमेच्या चांदव्याचे चांदणेही मंद आहे

आठवण येता तुझी होतो मनी नुसता पसारा

ये अता, चैतन्य पसरव गोड हसण्याने तुझ्या ॥ १ ॥

चार दिवसांचा दुरावा, युग उलटल्यासारखा

वाट बघुनी क्षीण झाल्या अंबरातिल तारका

बेचैन भिरभिरते नजर, पण सापडत नाही निवारा

तृप्त कर व्याकुळ मना अवचित बरसण्याने तुझ्या ॥ २ ॥

- अनामिक

(१३-२१/११/२०१६)