जिवास जडला नवा हवासा विकार आहे
नकळत झाला काळजावरी घाव मखमली
कुणी खुपसली मधाळलेली कट्यार आहे
कुणी खुपसली मधाळलेली कट्यार आहे
सुप्त अंतरी सप्त-सूर झंकारुन गेले
कुणी छेडली आर्त मनाची सतार आहे
कुणी छेडली आर्त मनाची सतार आहे
कुणी शिंपली उमेद हिरमुसल्या स्वप्नांवर
पुन्हा नव्याने जगावयाचा विचार आहे
पुन्हा नव्याने जगावयाचा विचार आहे
किती भासला क्षुल्लक, पण रुतल्यावर कळले
नजरेचा तो तीर किती धारदार आहे
नजरेचा तो तीर किती धारदार आहे
चलाख आहे गनीम, की मग मीच वेंधळा
धरण्यापूर्वीच ढाल वार आरपार आहे
धरण्यापूर्वीच ढाल वार आरपार आहे
इतका मोहक, लोभस आहे समोर शत्रू
हसत हसत मी हरायलाही तयार आहे
हसत हसत मी हरायलाही तयार आहे
- अनामिक
(०७-०९/०८/२०१६)
very nice ..... https://panchopoetry.blogspot.in/
जवाब देंहटाएं